كتابات خاصة

زميطة عيال بيتهوفن

مروان كامل

نشتي عمار يفوز نفرح، نشتي عمار العزكي يفوز بلقب عرب ايدول جالسين نصوّت له واحنا حراف بدون معاشات خمسة اشهر والكهرباء طافية ما نقدر نشوف البرنامج وجالسين نصوّت له عشان يفوز، نشتي نفرح، نشتي نفرح ياخي

اليمنيين ما عاد معاهم يبسروا من بلادهم الا عمار العزكي، آخر حاجة عادهم يبسروا فيها بلادهم هي عمار العزكي، ما عاد شي ثاني يبسروا فيها بلادهم، و ذا هي بلادهم تجاهك طويلة عريضة دوّر لالقيت حاجة عادهم يبسروا فيها بلادهم، ما عادبش قلت لك حرام لو تحلبها حلب، بـح، ما عاد غيره هذا الولد صاحب المحويت خلاه لنا ارحم الراحمين “عظمة عجب الذنب” في هذا الإنحلال والتفسخ الحضاري والوطني والإنساني الكبير اللي نعيشه من اول الحرب، والا القات. 
ونشتيه يفوز نفرح، نشتي عمار العزكي يفوز بلقب عرب ايدول جالسين نصوّت له واحنا حراف بدون معاشات خمسة اشهر والكهرباء طافية ما نقدر نشوف البرنامج وجالسين نصوّت له عشان يفوز، نشتي نفرح، نشتي نفرح ياخي
– يقولوا كيف نصوّت له ونخسر زلط واحنا نموت جوع
قولهم نشتي نموت جوع واحنا فارحين، اياً احسن نموت جوع واحنا زاعلين والا نموت جوع واحنا فارحين؟
– نموت جوع واحنا فارحين
خلاص قولهم نشتي نفرح، نشتي نموت واحنا فاعلين مُشقر
– نشتي نموت واحنا فاعلين مُشقر
ونشتي عشان يخرّج التراث اليمني المدفون ويوري الناس في الخارج انه تراث فني نفيس ما هو موجود مع بلد، وجالسين يسرقوه علينا كمّن دانق سع الآثار
– اي والله
الا يا ولد لجنة التحكيم حق عرب ايدول غاثت بي شوية
– ما فعلت
قدهم يحسسوني في الحلقتين الأخيرتين ان الحراوة المقنبعين المنورين هم الا امير دندن ويعقوب شاهين بس وعمار الا مدري كيف، جالسين يمكّنوه انت نكهة عرب ايدول، انت ملح البرنامج، ما كان عيسبر العرس الا بك  
– كيف
يقولوا عن المتسابقين بعد ما يغنوا انت فنان، انت عبقري، كنت هائل اليوم، يا دندن يا شيخ نفسك يا امير بين اخوتك، يا يعقوب يا سيف يلمع لادخل جسمك وجع …الخ
– اها
ويوصلوا لاعند عمار يقولوا له انت وصلت الرسالة، شكراً لأنك وصلت الثقافة دي، شكراً لأنك لقيت الضايعة ورديتها، شكراً لمدري ما هو ومدري ما هو، اجلس اتغدى
– شكراً بس
شكراً بس، شكراً لأنك وصلت الرسالة، شكراً لأنك وصلت الثقافة دي، اجلس اتغدى
– وهو جاء وصّل الرسالة وجلس يتغدى 
جاء وصّل شنطة الكسوة وجلس مراعي لحريوته يشلها يفوز باللقب
– وليش ما يقولوا له وهو والكل يا عمار يا شيخ نفسك يا امير بين اخوتك
كان يقولوا له يا عمار يا خاتم اليد يا مرصع بالذهب
– وبعدين
وبعدين دخلوا فجعوهم وهددوهم العميقين والعميقات حقنا عيال بيتهوفن
– منهم عيال بيتهوفن
هذولا يا مالي شوية مثقفين على شوية حداثيين على شوية نفسيات على شوية اختلاف يعجبهم يكونوا انا مختلف، انظر إليّ انا مختلف..
– انظر إليّ انا مختلف..
 على شوية ما يشتوا الا صوت قلك مدري كيف ذا هو هذا الصوت اللي يشتوه، يشتوا صوت للعمر قلك ما صوت عمار ما ينفعش، يشتوا صوت للعمر رولكس والا رادو
– لا حول ولا قوة الا بالله
قلهم يا خلق الله والله ان عمار معه خامة صوت نادرة وبديعة وما تشيخ ولا يضرها شي
– قالوا مابلا يشتوا الا صوت رولكس
مابلا يشتوا صوت رولكس والا رادو، يشتوا عمار يكون عبدالحليم حافظ والا طلال مداح والا ما يشتوش، عبدالحليم حافظ والا طلال مداح يشتوا نقومهم من القبر وهم ميتين ونديه يشاركوا في عرب ايدول عشان يعجبهم والا ما يشتوش
– عبدالحليم والا طلال!
والا جدهم بيتهوفن
– لا حول ولا قوة الا بالله
 قلهم يا خلق الله امير دندن حلو ما اختلفناش، لكن صوت عمار حلو والكل ومتمكن ونادر صوته ومميز و زد يمني حالي صاحب البلاد لافاز نفرح ويشرفنا وهذا وعشان الاغنية اليمنية والتراث اليمني، قلك لا مشو فنان ولا هو شي ومستغربين مستغربين ايش اللي يعجب الناس في صوته وللمه جالسين نشجعه، يفجعوك
– يا ساتر
قلهم يا خلق الله الناس فارحين به، افرحوا للناس هذولا فرحتهم، افرحوا لفرحتهم كان، شعب على ما هو ٢٥ مليون نسمة فارح بعمار، تستهينوا بفرحة شعب! كل الشعب فارح به مابلا انتوا مضايقين؟ كل الشعب ذوقه زبالة مابلا انتوا ذوقكم حالي وفنان! كل الشعب ما يفهمش في الفن واخبل ومابلا انتوا اللي تفهموا والحاذقين يا شوية فرغ في الفيسبوك؟ يفجعوك
– ابررررررد ابرد منهم ما عاد اشتيش اعرف عنهم شي عيال بيتهوفن هذولا، الا قلي كيف هددوا لجنة التحكيم ما قالوا لهم؟
قالوا لهم انتوا محجورين يا وائل ونانسي وحسن واحلام تزيدوا تقولوا على عمار هكذا رجاءً احنا مضايقين صوت عمار عليه مشاكل وقد احنا نتشارع في المحكمة
– اوف
عميقين
– وليش
قلك هم مضايقين قوي عمار مشو فنان زميطة ومنشد يخرجوه وتتحمل الام بي سي المسؤولية لافاز 
– وقد وصل للنهائي!
وقد فاز بلقب منشد الشارقة زمان، ووصل لنهائي عرب ايدول الآن، وعيفوز بلقب عرب ايدول والكل شكله، وعيكون يحيي حفلات كل يوم بدولة وتتسابق عليه شركات الإنتاج والقنوات التلفزيونية والإذاعات
– وعادوه مشو فنان!
وعادهم عيال بيتهوفهن جالسين يشارعوا على صوته في المحكمة
– لا حول ولا قوة الا بالله
ويجلسوا هكذا لاما يرجعوا يكونوا يمشوا في الشارع ويلقاهم اي واحد يقول لهم عمار فاز ويقوموا يلاحقوه ويراجموه بحجار
– إنّا لله وإنّا إليه راجعون طيب ايش فيه صوت عمار هذا لاما جالسين يشارعوا ويقاتلوا عليه؟
قلك زميطة صوت عمار زميطة محجور لافاز
– ايش زميطة؟
زميطة مزيقة صوت مزيقة
– ومالها المزيقة صوت المزيقة؟ المزيقة يعني المزيكا يعني صوت موسيقي! 
ايوه
– طيب خلاص اين المشكلة يا عيال بيتهوفن؟
زميطة قلك الزميطة
– مالها الزميطة 
ورث امهم.
*المقال خاص بـ(يمن مونيتور) ويمنع إعادة نشره دون الإشارة إلى مصدره الأصلي.
المقالات المنشورة تعبر عن رأي كتّابها ولا تعبر بالضرورة عن رأي “يمن مونيتور”.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى